Davao City – Napulo ka mga nagagamit ug tigpayuhot og iligal nga droga ang arestado atol sa gilusad nga managlahing buy-bust operation sa Davao del Norte kagahapong adlawa.
Unang gilusad ang operasyon alas-10:00 kagabii sa may Prk. Bagani, Brgy. Cuambuganm Tagum City diin nakuhaan og nagkantidad P1,000 nga gituohang shabu si Marivic Tan Casis Cubio, 43 anyos, residente sa maong lugar, diin sikop usab ang laing Rodelio Tan Casis, Relito Won Tan Casis, Catherine Marqueda ug Louie Jay Ligutom kinsa mibisita sa maong drug den ug narekober sulod sa panimalay ni Cubio ang 11 ka gramos sa iligal nga droga nga nagkantidad og P165,000.
Samtang giposasan usab alas 10:30 si Mae Burang Barriga, 29 anyos, minyo, ug residente sa Prk. 2, Brgy. La Filipina, Tagum City, kinsa nakuhaan og usa ka pakete sa gituohang shabu.
Sama sa naunang operasyon, laing upat ka mga bisita niini sa drug den ang nasikop nga sila si Randy Villegas, Arlyn Silvosa, Jonard Avelino ug Louie Aert Llesis ingon man ang pagkarekober sa 10 ka gramos sa gituohang shabu sulod sa panimalay ni Barriga nga nagkantidad og P150,000.
Sumala ni Philippine Drug Enforcement Agency 11 (PDEA-XI) Regional Director Antonio Rivera, ilado na ang duha ka mga drug den sa maong lugar diin ang mga tag-iya mismo sa panimalay ang naga-awhag sa mga users nga sa sulod nalang mismo mugamit aron malikay sa pagkasakop kanila.
Ang mga suspetsado balhog na sa PDEA Regional Office XI Jail Facility kinsa pulos mag atubang sa mga kasong kalapasan sa Sections 5, 6, 7, 11, 12 ug 15 Article II sa R.A. 9165 kun Comprehensive Dangerous Drugs Act of 2002.
RadyoMaN Jason Amisola
