Dipolog City – Daling giposasan sa kapolisan ang duha ka Fireman human nagpabuto sa ilang armas de fuego, samtang lango kini ilimnon makahubog alas 9:30 kagabii sa Purok Farmers, Barangay Olingan dakbayan sa Dipolog.
Ang naarestong mga suspetsado nailhan nga si Fire Officer 1 Esfred Baroy, 24 anyos, ulitawo nga kasamtangan naka-assign sa Sirawi Municipal Fire Station sa Lungsod sa Sirawai ug Fire Officer 1 Ian Cuaresma, 30 anyos , ulitawo nga naka-assign usab sa opisina sa Provincial Fire Marshal sa Barangay Galas, ang duha polos mulupyo sa Barangay Olingan.
Nasayran nag-inum ang duha sa dapit, duol sa balay ni Rolando Lagpac, sa dihang nalango sa ilimnon makahubog, nagpabuto sa kalima ka higayon gamit ang duha ka armas.
Miresponde dayon ang mga sakop sa Dipolog City Police Office sa pagpanguna ni SPO3 Leud Enoy human makadawat og taho sa gihimo sa mga suspetsado.
Didto naatlan ang duha ug nakompiska gikan sa posisyon ni FO1 Barroy mao ang usa ka unit sa Jericho caliber .40 pistol serial number 39313420 nga dunay magazine ug kargado sa 11 ka buhing bala igon man id sa BFP ug dukumento sa armas.
Samtang nabawi sab kang FO1 Curesma ang usa ka unit Hi-Cap Norinco Caliber .45 pistol serial number BB10867-11-246 nga dunay magazine kargado sab ug lima ka buhing bala.
Narekober sa kapolisan sa dapit ang upat ka basiyo sa Cal.40 pistola ug usa ka basiyo sa Cal.45 nga pistola.
Ang nakuhang ebidensya ang gidala sa buhatan sa dipolog pnp ug ang duha gihatud sa Zamboanga del norte Provincial Crime Laboratory alang sa paraffin test ug dayong gipadlak sulod sa selda.
Sa interview sa rmn dxdr sa mga dinakpan, aminado sila nakainom sa bino makahubog samtang sila nagbantay sa sinakong humay kon diin nagpasalba sila sa armas dihang dunay presensya sa gituhoan kawatan. (-r.m-)
