Human sa pipila ka bulan nga surveillance, hingpit na nahulog sa mga kamot sa mga awtoridad ang duha ka fish vendors nga namaligya og shabu.
Nagtinabangay ang Drug Enforcement Unit sa Davao City Police Office ug Sasa PNP sa paglusad og buy-bust operation batok sa duha ka drug pushers.
Gigamhan og gahum sa warrant of arrest ang mga awtoridad dihang gihimo ang operasyon nga nagresulta sa pagkasikop nila Louie Nakilan, ug Wilson Jamilon, pulos ulitawo, fish vendors, ug pareho nanimuyo sa muslim village, Kilometer 12, Sasa ning siyudad.
Gipusasan ang duha human gitunol nila ang usa ka sachet sa shabu sa pulis nga pusher ug buyer atol sa operasyon sa nasangpit nga dapit bandang 7:30 sa kabuntagon.
Nakumpiska gikan sa ilang possession ang walo ka sachet ug laing usa ka big size sa shabu, mga drug paraphernalia, ug .45 nga calibre sa pistol.
Sumala ni Police Senior Inspector Noel Villahermosa, hepe sa Sasa PNP, nga nagbunga na ang ilang taud-taod nga pagpaniid sa duha ka suspek kinsa adunay pending nga kaso.
Sila Nakilan ug Jamilon temporaryo nagtingkagol sa Sasa PNP samtang gihikay na ang mga kaso subay sa kalapasan sa Republic Act 9165 kun Comprehensive Dangerous Drugs Act of 2002 ug Republic Act 10591 kun Illegal Possession of Firearms ubos sa summary inquest.
Kasamang Joel Viray
