Arestado ang duha ka lalaki nga subject sang buy bust operation sa banwa sang Sara, Iloilo alas 3:50 kaina sang hapon (Hulyo 29).
Ginkilala ang mga subject nga sanday Jorge Balugal, 27 anyos sang Barangay Anoring, Sara kag Elvin Jon Castor, 26 anyos sang barangay Ilawod, Sara, Iloilo.
Ginhiwat sang gintingub nga puwersa sang Provincial Drug Enforcement Unit team 3 sang IPPO kag Sara Police Station ang buy bust operation batuk sa duha ka subject kon sa diin nabaklan ang mga ini sang isa ka sachet suspected shabu.
Narecover sa mga ini ang dugang nga anum ka sachet sang ginapatihan shabu, 200 pesos nga buy bust money, 20,000 pesos nga boodle money, duha ka cellphone kag duha ka motorsiklo.
Sa karon napriso na sa Sara Police Station ang duha samtang yara sa custody sang PDEU ang mga recoveries para sa nagakaigo nga disposiyon.
Magapangatubang naman sang kaso nga paglapas sa RA 9165 sanday Balugal kag Castor.
