Davao City- Patay sa pagpamusil sa usa ka riding-in-tandem ang duha ka mga lalaking gituohan nga mga nalambigit sa iligal nga droga sa Central Mati City, Davao Oriental.
Giila sa kapulisan ang duha ka lalaki nga sila Merlito Libanon alyas Hudas, hamtong ang pangidaron, iladong drug personality ug usa ka high value target in provincial level ug si Charcom Martin, 30 anyos, usa ka bag-ong drug personality.
Ang duha pulos residente sa may Upper Salazar Brgy. Central Mati City.
Sumala sa inisyal nga imbestigasyon sa kapulisan nga samtang nagsakay ang duha ka lalaki sa kolor itom nga motor, gilikayan niini ang checkpoint nga gimungtar sa kapolisan ug miliko ngadto sa usa ka village ug ayha pa man kini maka gawas, gipusil kini sa duha ka wala mailhing suspetsado sa naigo sa nagka lain laing parte sa kalawasan.
Human sa hitabo, daling misibat ang sa wala matino nga direksyon.
Gisulayan pa pagtabang ang mga napusilan ug gidala sa Davao Oriental Provincial Medical Center apan gideklara na kining patay.
Sa imbestigasyon sa usa ka Scene of the Crime Operatives kun SOCO, narekober gikan sa crime scene ang usa ka punto 38 nga revolver nga dunay lima ka bala, punto 45 nga pistol nga dunay sulod ka 7 ka bala ug usa ka sachet sa gidudahang shabu ug drug paraphernalia.
Ang mga items nga nakuha gikan sa crime scene anaa na sa kustodiya sa Davao Oriental Crime Laboratory Office sa siyudad sa Mati aron sa dugang imbestigasyon.
Naghimo na usab og imbestigasyon ang kapulisan aron mailhan ug masikop kadtong riding-in-tandem nga mipusil sa duha ka lalaki.
RadyoMaN Paul Canono
