Davao City – Onsehan sa droga ang gilantaw nga anggulo sa Tagum City Police sa pagpamusil-patay sa duha ka mga lalaki sa sa may Brgy. Madaum, Tagum City.
Giila ang mga biktima nga sila Florendo Casusula, 25 anyos ug Alen Entencia, 24 anyos parehong mga taga-Brgy. New Visayas Panabo City, Davao del Norte.
Matud ni Police Major Philip Ayban ang chief of police sa Tagum City Police Office nga base sa pamahayag sa mga nakasaksi adunay transaksyon sa droga ang suspek ug ang duha ka mga biktima.
Gibutyag ni Ayban nga gipasang-at na nila ang kasong murder batok sa suspek kinsa anaa usab sa talaan sa drug personalities sa Tagum City.
Gikuha na sa mga tagtungod ang mga patayng lawas sa mga biktima gikan sa morgue sa Davao Regional Medical Hospital.
Nakarekober og 3 ka mga basyo sa crime scene ang SOCO nga gituohang gikan sa .45 nga pusil.
Nahitabo ang pagpamusil alas-10:50 sa buntag niadtong Dominggo.
Samtang, matud ni Philippine Drug Enforcement Agency XI Atty. Behn Tesiorna nga dili kini malikayan nga magunay ra mismo ang mga nahilambigit sa droga.
Giawhag ni Tesiorna ang mga taga-Madaum nga tabangan ang PDEA pinaagi sa pagtunol kanila’g impormasyon sa mga illegal drug activities sa ilahang mga lugar.
RadyoMaN Aimee Guinita
