Davao City – Samaran ang duha ka mga lalaki nga si Dexon Aligo del Pilar, 20-anyos, ug si Raymund Bongcales Gamulo, 29-anyos, ug nagpuyo sa Prk. 3 Talomo River, Calinan, human kini gipangdunggab og binuak nga botelya.
Base sa report nga bandang alas-7:30 sa milabay’ng gabii samtang nangbalik kini og dagat sa may Bago Beach sa Brgy. Bago Aplaya, nahulog matud pa ang mahalong cellphone ni Gamulo.
Gani ila kining gisubay pabalik sa ilang gi-arkilahang cottage aron sa pagpangita sa cellphone, gibato na sila og botelya diin daling midagan pa layo ang suspek hinuon ilang na-corner.
Wala damha nga nagbitbit matud pa og botelyang buak ang suspek ug gipangdunggab ang mga biktima igo sa dughan ug ilok nga bahin.
Hinoon, nadakpan man ang suspek sa kapolisan sa Talomo ug naila nga si Daryl Cuestas Bragat, 19-anyos, usa ka panday ug residente sa Bago Aplaya ning siyudad diin narekober ang Samsung J1 nga gipanag-iyahan sa mga biktima.
Kasamtangan nga nagpaalim pa ang mga biktima sa ilang gihambin nga mga samad dinunggaban sa balay-tambalanan.
RadyoMaN Paul Canono
