Duha ka lalaki nga nakit-an nga nagautaw-utaw sa kadagatan sakop sang Anini-y , Antique, nakilala na; mga mangingisda tumandok sang Guimbal, Iloilo

Yara na sa luwas nga kahimtangan ang duha ka mangingisda nga una na ginpahayag na-missing sa kadagatan sakop sang Guimbal, Iloilo.

Ini amo sanday Jerry Baat, Sr., 40 anyos kag si Jerry Baat, Jr., 20 anyos , lunsay residente sang Brgy. Nalundan, Guimbal.

Suno kay Lt. Commander Ramil Palabrica, spokesperson sang Philippine Coast Guard – Western Visayas, nagapangisda ang mg ini alas 4:00 sang kaagahon tubtob alas 7:00 sa aga sang ginhampak sang dalagko nga balud ang ila motor banca kag nagkapan.


Gin-anud ang mga mangingisda tubtob sa San Roque , Anini-y, Antique.

Sa bulig sang *Municipal Disaster Risk Reduction and Management Office* ( *MDRRMO*) sang Anini-y , Antique kag Coast Guard – Antique, na-rescue ang duha kag gindala sa Dao District Hospital agud magpaidalom sa medical check-up.

Samtang gin-athag ni Palabrica nga wala pa gihapon makit-an ang duha ka mangingisda nga na-missing man matapos ginsalakay sang RORO vessel ang ila fishing boat sa kadagatan sakup sang Iguana bank sa Guimaras alas 11:00 kagab-i, Enero 3 .

Suno kay Palabrica, magapadayon ang search operation sang PCG- Western Visayas agud makita sanday Lupin Desposo, 43 anyos kag Sito, 38 anyos.

(photo from web/ not the actual photo)

Facebook Comments