General Santos City–Patay ang usa ka Alger Sumundong, legal age, usa ka butcher, nanimuyo sa may Purok Intake, Barangay Mabuhay, Gensan samtang angol ang kaubanan niining si Banay Alano, legal age, Matadero sa Slaughter House human gipamusil sa wala pa mailhing suspek alas 12:00 ang takna sa tungang gabie atubangan lang sa Slaughter house nga nahimutang sa maong lugar.
Subay sa inisyal nga imbistigasyon sa mga personahe sa Police Station 4 nasuta nga kasamtangang nangape ang mga biktima dihang kalit niabot ang tulo ka mga suspetasdong nakamotorsiklo dayon gipusil ang biktimang si Alger samtang damay ang biktimang si Banay Alano.
Si Sumundong nakaangkon ug samad sa iyang dughan samtang si Alano nakaangkon ug samad sa iyang abaga, paspas nga misibat ang mga suspek sa wala sayring lugar samtang ang mga biktima gipangdala sa ospital apan gideklarang dead on arrival si Sumundong.
Subay sa pahayag sa mga nakakita, pulos nakataptap ang nawong sa mga suspetsadong responsable sa pagpamusil. Sa karon nagpadayon pa ang gihimong imbistigasyon sa kapulisan kalabutan sa insidenti.
