Roxas City, Capiz- Patay ang duha ka mga bata nga babaye matapos nalumos takna alas 10:00 kaina sang aga sa baybayon nga sakop sang Brgy. Culasi, Roxas City. Dead on arrival na sang gindangat sa Roxas Memorial Provincial Hospital ang lima ka-tuig nga bata sang mag-asawa nga Mary Joy kag Edison Bacolod.
Ginbawian man sang iya kabuhi ang isa pa gid ka biktima nga nagapang-edaron sang apat ka tuig nga anak ni Mylene Aninang samtang ginadapatan sang pagbulong sa St. Anthony College Hospital. Ang mga biktima lunsay residente sang nasambit nga lugar kun sa diin malapit gid lamang ang ila nga poluy-an sa baybayon.
Nasapwan na lamang ang duha ka mga biktima nga nagakulob kag nagalutaw na sa baybayon malapit sa Flatrock Beach Resort nga nahamtang sa Brgy sang Culasi. Gilayon nga nagresponde ang Capiz Emergency and Response Team (CERT) kag ginhingagaw nga madala sa ospital ang duha ka mga biktima.
Ginapatihan nga nagdugay na sa tubig ang duha ka mga bata sang nasapwan ini rasun nga wala gid nasugpunan ang ila kabuhi. Emosyonal nga ginpahayag sang iloy nga si Mary Joy Bacolod nga ang pagdumdom sini yara lamang sa palibot sang ila poluy-an ang duha apang ginkakibot na lamang sini sang ginpahibalo nga nalumos ang anak.
[IN PHOTO] – lugar nga ginluntaran sang insidente, kun sa diin makit-an ang tsinelas sang isa sa mga biktima
