BACOLOD CITY – Nagapanawagan naman ang duha ka mga kabataan nanday Francis kag Cathy Cabuga sa ila Daddy nga kon mahimo untatan na ang ginahimo sini sa ila Mommy nga paghatag sang problema.
Suno kay McKoi, 9 kag Iska, 11 nga kon mahimo istoryahan nila ini nga magpamilya kag indi pag-intrahan sang abogada sang ila Daddy nga si Atty. Erfe del Castillo.
Nagpabutyag naman ang duha ka mga bata kay Atty. Del Castillo nga kon mahimo indi na paggamuhon ang ila nga pamilya, bangod indi sila magpasugot nga kontrolahon sini ang hotel kag iban nga propedad nga ginapanag-iyahan nila.
Pasakaan man sini sang kaso ang abogada bangod man sa ginhimo sini nga pagbalabag nga mahatag ang mensahe sa iya Daddy sa diin ginkumos pa niya ang amu nga sulat nga nagtuga naman sang kalain sang buot ni Iska.
Madumduman nga sang nagligad nga Martes, may natabo nga stand-off sa Metro Inn matapos nga ginpasirad-an nanday Mr. Cabuga kag Del Castillo ang hotel nga wala sang court order. Sa sina madamo nga mga kaso ang alatubangon sang duha kag iban pa nga nagsulod sa hotel suno kay Mrs. Cathy Cabuga.
Gina-inventory man ni Mrs. Cabuga ang mga gamit nga nagkalaguba matapos nga padayon pa nila ginareview ang CCTV para magamit nga ebidensya kontra kay Mr. Cabuga, Castillo kag iban pa.
Bilang tag-iya kag nagpangabudlay para mapatukod ang amu nga hotel, indi magpasugot si Mrs. Cabuga nga daug-daugon lang sila ni Del Castillo nga amu naman karon nagakontrol sa iya bana nga wala sa insakto nga panimuot bangod man sa ginsiling sini nga nagagamit sang ‘druga’.
Ang apelasyon ni Mrs. Cabuga nga magpaminsar sang madalom ang iya bana bangod kay ang iya ginhimo para sa ila kag iya kabataan.
Indi dapat magpakontrola ang iya bana interes sang abogada, ugangan kag mga tawo sa palibot ni Mr. Cabuga bangod kon matabo ina, ang ila kabataan ang makaluluoy. / Hungod nga gintago sang dyHB ang itsura sang mga kabataan bangod ini sila mga menor de edad
