Malampusong nasikop sa kapulisan ang duha ka mga drug personality kagabie. Kini atol na sa gihimong anti-illegal drug buy bust operation sa mga operatiba sa PS6 Puerto diha sa Brgy. Agusan ning syudad sa Cagayan de Oro.
Naila ang mga dinakpan nga 33 anyos nga si Jomar Calma, minyo nga walay trabaho nga taga Purok 5, Naga, Brgy. Puerto ning syudad u gang 32 anyos nga si Arnel Dalauta, ulitawo nga wala sab trabaho nga taga Zone 6, Mahayag sa Brgy. Agusan ning syudad sa Cagayan de Oro.
Nasayran nga napalitan sa usa ka sachet sa gituhoang shabu ang mga suspetsado balor 500 pesos nga maoy hinungdan sa ilang pagka-aresto.
Atol sa pagrekisa sa maong mga dinakpan, nakuha pa gikan sa posisyon ni Calma ang laing 4 pa ka mga sachet sa gituhoang shabu nga gisulod ni-ini sa kolor itom nga coin purse. Lakip nga narecover ang 500 peso bill nga ginamit isip buy bust money.
Gibana-banang motimbang sa dos gramos ang tanang nakumpiskang mga kontrabando gikan sa mga suspek nga moabot ang kantidad ngadto sa kapin 13 mil pesos.
Gikustodiya na karon sa Mini Custodial Facility sa Police Station 6 Puerto ang maong mga dinakpan. Samtang giandam na ang mga dokumento alang sa pagpasang-at sa kasong pagsupak sa R.A. 9165 kon Comprehensive Dangerous Drugs Act of 2002 batok nilang Jomar Calma ug Arnel Dalauta.
Kasama mo sa PS6 Puerto, RadyoMaN Andy Coco, DXCC Tatak RMN!
