Pagadian City – Gikompirmar kagahapong adlawa sa ZamboSur Task Force COVID 19 nga nadugangan ug duha ang mga natalang nagpositibo sa COVID 19 dinhi sa probinsya.
Ang nagpositibo mao ang 23 anyos nga lalaki nga residente sa 34 Barangay Bliss, sakop sa lungsod sa Molave, Zamboanga del Sur kinsa mao ang ikapito nga nagpositibo sa COVID 19 dinhi sa probinsya.
Nasayrang ang maong pasyente ang gikan sa 67, Basak, Pardo, Cebu City ug mibyahe sakay sa Cokaliong Shipping Lines gikan sa Cebu City paingon sa pantalan sa Ozamiz City.
Ang ikawalo nga nagpositibo mao ang 22 anyos nga taga Brgy. Panubigan, Pitogo, Zamboanga del Sur kinsa gikan sa Kamputhaw, Cebu City.
Midangat ang duha ka LSI sa Megayon Stage, Dao, Pagadian City kaniadtong Hunyo 14, ug gipailalom sa rapid diagnostic test.
Migawas nga IgM ” Reactive” si patient #7 ug giadmit sa Zamboanga del Sur Medical Center gumikan sa nasinatiang kaluya sa lawas samtang positibo usab ang resulta sa rapid diagnostic test ni patient #8 nga miangkon nga nakasinatig panakit sa tutunlan.
Usa ka oro/ nasopharyngeal swab ang gipahigayon sa duha ka pasyente. Pagka Hunyo 17 gidala ang ilang swab sample ngadto sa Zambo.City Medical Center Molecular Laboratory.
Kagahapong adlawa migawas ang resulta ug kompirmadong positibo ang duha sa COVID 19.
Hinoon, anaa na sa stable nga kondisyon ang duha ka mga pasyente.
Si patient #7 ang kasamtangang naka confine sa Zambo.Sur Medical Center samtang si patient # 8 ang gi isolate sa Pitogo Municipal COVID Ligtas Center.
