Nakita na sa baybayon sang Cauayan, Negros Occidental ang duha ka mga mananagat nga taga-Guimaras nga ginpahayag na-missing sadtong February 16, 2021 matapos nagpangisda sa kadagatan sang Nueva Valencia, Guimaras.
Ini sila ginkilala nga amo sanday Stephen Malapitan kag Modesto Balidiong, lunsay pumuluyo sang Brgy. La Paz, Nueva Valencia.
Sa interview sang DYHB kay William Bilbao, pakaisa sang duha ka mananagat, iya ginsiling nga nakita sanday Malapitan kag Balidiong sa Cauayan matapos ini sila ang gin-report nga nadula.
Nahibaloan nga pasado las 9 sang aga nagpangisda ang duha, apang naubusan sang gasolina ang ila pumpboat kag indi man ma-kontak ang ila pamilya bangud drained na ang battery sang ila mga cellphone.
Bangud sini, nagpa-anud anod na lang ang duha tubtub nga ini sila ang nasampay kag ginbuligan sang mga katapo sang Bantay Dagat.
Tubtob subong wala pa makapauli sa ila lugar ang duha ka mga mangingisda bangud nga ginahulat pa nga magkanay-kanay ang balud kag mag-ayo ang tiempo antes sila igadul-ong sang Philippine Coast Guard sa Guimaras.
Sa karon yara sa paghinakup sang LGU Cauayan ang amo nga duha ka mga mananagat.
[image: image.png]
