Nag-reklamo na ang mga residente sa Barangay Patag sa lungsod sa Manticao, sa Misamis Oriental, batok sa duha ka mga poultry nga naa mismo daplin sa dalan, tungod sa dili na maagwanta nga baho ug ang pagdagsang sa mga langaw.
Kini tungod kay nakasinati na sa pagsuka-suka ang mga residente sa Purok 1 ug sa Purok 2 tungod sa baho ug mangaon na sila sulod sa ilang kuwarto nga nag-mosketiro tungod sa ka-baga sa mga langaw nga motugpa sa ilang pagkaon matag adlaw.
Dili na usab sila makaluto ug makaandam og insakto sa ilang pagkaon tungod kay segundo pa lang, gitugpahan na kini sa bagang mga langaw.
Matud pa ni Ilyss Anticamara, residente sa Purok 1, nakaabot na sa Environmental Management Bureau-Region 10 niadtong Oktubre sa nakalabay’ng tuig ang ilang reklamo batok sa duha ka mga poultry diin ang usa gipanag-iyahan sa pamilya ni Municipal Councilor Jaycel Maquinto, kinsa mao usab ang committee chairperson on health sa Sangguniang Bayan sa Manticao.
Ang usa, gipanag-iyahan ni Arrish Canonigo, kanhi provincial board member sa Misamis Oriental.
Niadtong Abril karong tuig 2019, nagpagawas ang EMB 10 og notice of violation tungod kay wala gituman sa mga tag-iya ang ilang gisaad nga mokuha og discharge permit ug permit to operate, paghatag og Compliance Monitoring Report, pakyas nga pagbutang og accredited nga Pollution Control Officer ug ang pakyas nga pagbutang og steel hood aron ma-limita ang baho nga gikan sa mga hugaw sa manok.
Ang caretaker lang sa poultry ni Konsehal Maquinto ang mi-atubang sa media kagahapon ug miingong gituman nila ang ilang gisaad sa EMB nga pagsumpo nga modaghan ang mga langaw apan dili gayud nga malikayan ang pagdaghan sa maong mga insekto. Apan wala na kini mitugot nga mosulod ang media tungod kay maoy tugon sa iyang amo.
Walay mi-atubang sa poultry ni Canonigo ug bisan ang guwardiya, wala kini motubag sa pagpanuktok sa media nga gi-ubanan sa kapitan sa barangay.
