Duha ka adlaw human mapatay sa engkwentro sa militar ang usa ka gituohang membro sa ISIS Dawlah Islamiya, duha ka mga supporters sa grupo ang mitahan niadtong Dominggo sa hapon ngadto sa 82nd Infantry Battalion sa Barangay Gacap, Piagapo, Lanao del Sur.
Matud pa ni Colonel Jose Maria Cuerpo, commander of the 103rd Infantry Brigade, ang duha nailang sila si Farhan Salik, 20 anyos, ug Alimoden Maunada, 38, pulos mga residente sa lungsod sa Piagapo.
Miingon si Cuerpo nga si Salik ug Maunada maoy nagsilbing ‘eyes and ears’ o ‘mata ug dalunggan’ sa grupo nga ang trabaho mao ang pagbantay sa kadalanan samtang adunay ipahigayong movement ang grupo.
Kung kahinumduman nga hapon niadtong Biyernes, na-engkwentro usab sa tropa sa 82IB ang kapin kun kulang napulo ka mga armadong gituohang sakop sa Dawlah Islamiya, didto sa mga daluna sa Balindong ug Piagapo nga gikamatay sa usa ka nailang Jarir Usman, 28 anyos.
Naila si Usman pinaagi sa iyang identification card dihang estudyante pa kini sa kursong Bachelor of Science in Management sa Mindanao State University (MSU) Marawi campus kung asa mi-gradwar niadtong tuig 2015.
