Daling giendosar sa Talomo Police Station Women and Children Desk ang kustodiya sa duha ka minor nga giilang sila si Alyas Junior, 15 anyos, ug Alyas Dodong, 16 anyos pulos mga residente sa Matina Pangi, Davao City.
Gisaksihan ni Barangay Matina Pangi Kagawad Sanico, ang pagluwas o rescue sa mga pulis sa naasoy nga mga minor human sila ang gitumbok nga nikawat og duha ka cellphone sa construction worker nga si Mamasoy Dungay, 27 anyos, stay-in sa bunkhouse sa construction site nga nahimutang sa nasampit nga lugar.
Nasayran, nadiskubrehan ang pagpanglungkab bandang alas 6:00 na sa buntag diin sa pagpanubay sa kapulisan nasuta ang duha ka batan-on maoy gitudlong misikwat sa cellphone.
Ang maong cellphone gibaligya sa mga minors ngadto sa usa ka Alyas Alvin, 23 anyos ug Alyas James Ryan nga mga residente ra usab sa maong lugar.
Hinoon, wala na gisulti sa kapulisan kung kasohan ba ang mga nakapalit sa kinawat nga mga cellphone tungod sa paglapas sa anti-fencing law.
RadyoMaN Joel Viray
