Davao City – Nisilaob ang usa ka motorsiklo human nagbangga sa laing kasugat nga motor kaganihang kadlawon nahitabo sa kanto Davao-Bukidnon road padulong sa Brgy. New Loon, Tugbok distrct ning syudad.
Ang mga driver gipang-ila nga sila si Andrie John Arfapo, 35 anyos, residente sa may Dumanlas Buhangin, kinsa nagmaneho sa nisilaob nga motor ug laing Cesar Constantino Tatoy Jr., 29 anyos, residente sa Doña Aurora Brgy. Sto. Niño Tugbok district.
Sa record sa Tugbok PNP, ang duha ka mga motorsiklo nagsugat sa managlahi nga direksyon diin sa pag-abot sa kanto Brgy. New Loon, miliko pa-wala ang usa ka motor kinsa ulahing nabantayan sa laing driver rason sa pagkabangga niini.
Sa kakusog sa impact, nasadsad ang motorsiklo ni Arfapo sa semento hinungdan nga ni-spark kini diin paspas nga nikatay ang gasoline ug dayon nisilaob kini.
Daling gidala sa Southern Philippines Medical Center (SPMC) ang mga samaran ug padayon kining ginatambalan samtang temporaryong gikustodiya sa buhatan sa kapulisan ang mga motorsiklo ug gi-refer na sa Land Transportation Office (LTO) ang maong kaso alang usab sa pagproseso sa insurance kung rehistrado ba ang maong mga behikulo.
RadyoMaN Paul Canono
