Roxas, Zamboanga del Norte – Duha ang nakabsan sa kinabuhi samtang duha usab ang nanga-angol human nagsungag ang duha ka mga motorsiklo kagahapon bandang alas 8:00 sa gabii sa may national highway, Barangay Nabilid, lungsod sa Roxas, Zamboanga del Norte.
Dead on arrival sa Provincial Hospital, ang driver sa motorsiklo mio nga si Fredrich Von Megio, 23 anyos, ulitawo, usa ka graduating student sa crim nga taga Barangay Poblacion North, Polanco, samtang angol sa walang tuhod ang angkas nga si Carlo Mangubat, 23 anyos nga taga Barangay. Pitogo, lungsod sa Gutalac, Zamboanga del Norte.
Ang gikabanga sa mga biktima mao ang motorsoklo skygo nga gimanehoan ni Henry Sandayo, 45 anyos, kinsa naka-angkon og samad sa ulo, og bun-og sa kalawasan samtang patay ang iyang angkas nga si Benbenido ‘Ben’ Baguio, hingkod ang edad, nga parehong residente sa Barangay Pongolan, lungsod sa Roxas, Zamboanga del Norte.
Sa nakuhang impormasiyon sa rmn dxdr, nasayran nga gikan sa Dipolog City ang mio nga gisakyan sa mga batan-ong rider paigon unta sa lungsod sa Manukan apan pag-abot na sa dapit hitaboan, nakatagbo nila ang naghaguros nga motorsiklo skygo nga gimaneho ni Sandayo nga matud pa nagmaneho nga lango sa ilimnong makahubog hinungdan sa aksidente.
Tungod sa kakusog sa impak sa panagbangga, nakaangkon og grabeng samad sa ulo ang driver nga si Megio nga miresulta sa hinanali niini nga kamatayon. samtang patay sab ang angkas sa gikatagbo nga motorsiklo nga si Baguio pila ka oras ang milabay.
Nasayran nga ang duha ka driver og mga angkas sa motorsiklo polos way gisul-ob nga helmet atol sa hitabo.
Sa pagkakaron, gi-imbestigahan pa sa kapolisan ang tinuod nga panghitabo.
