Davao City – Giposasan sa kapulisan ang duha ka drug pushers kinsa nagbaligya og inugang marijuana ngadto sa pulis nga nagsilbing poseur buyer atol sa gilusad nga buy-bust operation sa managlahing oras ug lugar.
Unang nadakpan mao si Mark Bunag, 20 anyos, ulitawo, walay trabaho, ug nagpuyo sa Purok 11 Doña Salud Subdivision Sasa ning syudad human gitunol niini ang marijuana kang PO1 Jamerie Manalo alas- 7:00 sa kagabhion.
Nakumpiska gikan kaniya ang ubay-ubay nga nilokot nga papel sa marijuana, 200 nga mark money, ug cellphone.
Nasignit usab sa buy-bust operation ang laing usa ka drug pusher nga si Ju Bock Dovonou, 21 anyos, walay trabaho ug nagpuyo sa Garcia heights, Bajada ning dakbayan.
Gidakop si Dovonou human nagbaligya kini og marijuana ngadto sa poseur buyer nga si PO1 Reymar Bongan diin narekober gikan kaniya ang laing plastic unod ang inugang marijuana, 100 pesos nga mark money ug cellphone.
Nasayran nga pila sab ka bulan gitiktikan sa mga sakop sa Sasa Pnp Station Drug Enforcement Team ayha hingpit nahulog sa kamot sa mga otoridad ang mga suspek kinsa napareho nang gipaslak sa selda.
Kasong may kalapasan sa Section 5, ug 11 sa Republic Act 9165 kun Comprehensive Dangerous Drugs Act of 2002 ang ipasang-at batok sa duha ka dinakpan.
RadyoMaN Joel Viray
