Duha ka bantog nga resorts sa probinsya sang Guimaras ang nabiktima sang scam gikan sa caller nga nagpakilala nga Gobernador sang Probinsya kag nagpa-book sang accomodation kag nag-order sang pagkaon.
Ginpahayag ni Leizle Galan, PIO II sang Guimaras Provincial Government nga anum ka mga resorts ang gintawgan sang scammer sang nakaligad nga Sabado apang duha sa mga ini ang natontohan gid.
Ini nga mga resorts amo ang Magic Island Resort kag Andana resort.
Suno kay Galan nga nagapanawag ang scammer sa natungdan nga mga resorts kag nagapakilala nga si Governor Samuel Gumarin kag nagapangayo sang load sa cellphone kag nagpa-reserve sang hotel rooms kag nag-order sang pagkaon.
Sa bahin sang Magic Island resort, nagpangayo ang suspek sang 12 mil pesos nga balor sang cellphone load kag nagpa-book sang accomodation kag nag-order sang pagkaon kon sa diin naglab-ot tanan sa 22 mil pesos ang nadale sa ila sang scammer .
Sa Andana resort naman, nakuhaan sila sang 650 pesos nga balor sang cellphone load kag nag-order sang pagkaon nga para sa 15 ka tawo.
Bangud sini, ginapanugyan sang Provincial government sang Guimaras sa mga resort owners nga dapat i-verify gid anay kon may magpanawag sa ila nga nagagamit sang ngalan sang mga government officials sa pag-transact sa ila agud indi mabiktima sang scam.
