Davao City – Human sa pila ka buwan pagtago-tago gikan sa kamot sa mga otoridad hingpit na punggitan sa pukot sa kapulisan ang usa ka wanted.
Nakubit ang wanted pinaagi sa joint operation tali sa Intel Section sa Davao City Police Office (DCPO) sa pagpanguna ni Supt. Jed Clamor ug sa Buhangin PNP nga gipangulohan sa hepe nga si Police Chief Inspector Jack Tilcag.
Gisikop si Jimmy Gimo, 28 anyos, ulitawo, laborer ug nagpuyo sa Phase 1 Sandawa Village, Buhangin pinaagi sa warrant of arrest nga gipagawas ni Judge Marie Estrellita Tolentino-Rojas, presiding judge sa MTCC Branch 2 Hall of Justice gumikan sa kasong kawat.
Gidakop ang suspek sa gilunggaan niini sa may Sitio Apiki, Brgy. Tigatto, Buhangin ning dakbayan. Ang korte nagrekomendar og 12-mil ka pesos nga bailbond alang sa temporaryo nga kagawasan sa suspek apan kung dili makabayad sa mao nga kantidad hayan dad-on kini sa Davao City Jail si Gimo.
Sa pikas bahin, nadakpan sa Bunawan PNP ang usa ka lalaki nga dunay kaso natigayon alas 5:00 sa buntag sa bulan sa enero 4, 2018 atol sa gilusad nga Anti Criminality Terrorism Clearing Operation didto sa Blk. 1-9 Muslim Village Brgy Ilang siyudad sa Davao.
Subay sa Blotter sa bunawan Pnp naila ang dinakpan usa ka Antio Tobal, hingkod ang edad, residente sa nasangpit nga lugar.
Matud pa nga ang suspek dunay standing warrant of arrest sa kasong robbery nga giisyo ni Presiding Judge Emmanuel Carpio sa branch 16 sa 11th Judicial Region.
Ang dinakpan preso na sa Bunawan Police Station.
Sumala ni Police Chief Inspector Estrello Ramiso Station Commander Bunawan Pnp nga ubay ubay na ang nasikop nga dunay mga kaso partikular sa ilang A.O.R gikan sa pagsugod ug pag implementar sa Anti Criminality Terrorism Operation sukad sa paglingkod ni Davao City Police Office City Director Police Senior Supt Alexander Tagum.
RadyoMaN Joel Viray / RadyoMaN Don Pulayao
