Pilason ang duha ka soldado sa isa ka engkwentro las 8:30 kaina sang aga, April 24 sa tunga sang 79th Infantry Batallion kag katapos sang rebelde nga New People’s Army sa Barangay 11 (Gawahon), Victorias City.
Ginkilala ang mga napilasan nga suldado nga sanday Corporal Louie Maghanoy kag Corporal Ramy Chiefe.
Suno kay 303rd IB Commander Coronel Inocencio Pasaporte, nagapatigayon sang information dissemination angut sa COVID-19 ang mga katapo sang Scout Platoon sang Philippine Army sa pagpanguna ni 1Lt. Ricky Bartolome upod ang PNP SAF sang ini ang naka-engkwentro ang indi pa matumod nga numero sang rebeldo.
Ginpahayag nga wala sang napatay sa bahin sang tropa sang gobyerno samtang ginapatihan nga may napatay sa bahin sang NPA.
Na-recover sa encounter site ang duha ka improvised explosive device, mga bala sang AK47 kag M16, mga subersibo nga dokumento kag iban pa nga mga kagamitan.
Matandaan nga sadtong Lunes naka-engkwentro sang tropa sang gobyerno ang mga NPA sa syudad sang Himamaylan nga nagbilin sang tatlo ka patay sa bahin sang mga suldado.
