Davao City – Gipasang-at na sa kapolisan sa San Pedro PNP ngadto sa City Prosecutor’s Office ang kasong kalapasan sa Akta Republika 8485 kun Animal Welfare Act batok sa duha ka mga suspek nga sila si Tennessee Antolo, hingkod ang edad, ug kang Ian Silanam, kinsa pulos residente sa Bacaca sakop sa Brgy. 19-B siyudad sa Davao.
Kahinumdoman nga mireklamo sa kapolisan sa San Pedro ang tag-iya sa iro nga si Grace Balante batok sa duha ka suspetsado nga maoy responsable matud pa nga mitigbas sa iyang alagang iro nga ginganlang Avatar.
Sumala ni Balante, gipatiran matud pa ni Silana sa walay igong rason ang iyang iro samtang si Antolo ang matud pa mitigbas niini gani nakahiagom kini og samad-tinigbasan sa tuong bahin sa liog.
Sa pagka karon, padayong ginatambalan sa mga veterenarians ang angol nga si Avatar samtang wala pay witness nga mipatim-aw sa Sta. Ana PNP kabahin usab sa laing iro kinsa gipusil sa milabay’ng adlaw nahitabo sa may Sta. Ana Wharf sumala sa giluwatang pamahayan ni Police Chief Inspector Michael Uyanguren, Station Commander sa Sta. Ana PNP atol sa pakighinabi sa DXDC News Team kaniya.
RadyoMaN Don Pulayao
