Patay ang duha ka civilian samtang pilason ang duha ka pulis kag 1 ka media practitioner sa shooting incident nga nagluntad sa Brgy. Atabay, San Jose, Antique kahapon sang aga.
Ginkilala ang mga napatay nga sanday Ervin James Checa, 32-anyos , may asawa kag nagapalakat sang RR Internet Café kag Ana Anacleto, 24 anyos, nagabantay sang internet café nga lunsay may igo sa ulo.
Samtang nakaagum naman sang pilas sa tangkugo ang magulang ni Ervin James nga si Stephen Louise Checa, 36 anyos kag correspondent sang Panay News.
Pilason man sanday Corporal Albert Talidong kag Staff Sergeant Cyrell Valdevieso sang San Jose, Antique matapos ginluthang sang suspek nga si Venom Dio Vergara , 22 anyos.
Suno kay Yanyan Rivera, abyan kag kaupod ni Ervin James sa pagpalakat sang internet café, nagapanugid sa iya si Ervin nga nagalain ang buot ni Vergara bangud wala ginahatagan sang password sang wifi.
Magluwas diri, nagapangaluyag man si Vergara kay Ana apang ginbasted ini sang dalaga .
Ginapatihan nga nagapangimon si Vergara matapos nakamuno ini sang una nga madamo sang traidor sa palibot.
Suno kay Yanyan nga nagluntad ang indi pag-intyindihanay sa tunga sang suspek kag ni Ervin James tubtob nag-abot si Stephen Louise kag ginpatung-an ang duha.
Ginpahayag ni Yanyan nga possible naakig si Vergara sang nag-abot ang mga pulis rason nga iya na lang ginluthang si Stephen gamit ang 99 mm nga pusil kag ginbalikan sanday Ervin kag Ana sa sulod sang computeran kag iya man ginluthang.
Ginpalukpan man ni Vergara ang mga pulis nga nagresponde rason nga makit-an sa cctv ang pagtumpilak sang isa ka pulis.
Nadaplisan sa mata si Corporal Talidong samtang daplis sa kilid ang naangkon ni Staff Sergeant Valdevieso.
Base sa report, sige ang karga ni Vergara sang magasin sa pusil samtang nagapalagyo.
Nagpatigayon sang hot pursuit operation ang mga pulis kag pagkatapos sang 30 minutos, nadakpan si Vergara sa Brgy. Supa sa talamnan nga may igo sa tiil kag daplis sa kilid.
Ginpahayag nga ang pusil nga gingamit sang suspek ang iya sang amay nga konektado anay sa militar.
Gin-surrender na sang amay ang mga armas luthang bangud expired na ang lisensya.
Preso naman si Vergara matapos nakagwa na sa hospital kahapon sang aga.
