Pilason ang duha ka tawo matapos pangluthangon sang suspek sa Purok II, Barangay Cawayan, Carles, Iloilo mga alas 11:20 kahapon sang aga.
Ginkilala ang mga biktima nga amo sanday Ricky Medalla alyas Banoy, 43 anyos kag Rodney Olarte alyas Boyet, 47 anyos lunsay pumuluyo sang nasambit nga lugar.
Samtang ang suspek ginkilala naman nga si Noel Almario, alyas Bugro, legal ang pang-edaron kag residente sang amo man nga lugar.
Ginpahayag ni PO3 Kristoffer Balaan, imbestigador sang Carles PNP nga natabu ang insidente matapos magluntad ang mainit nga pagbaisay sa tunga sang mga biktima kag suspek bangud lamang sa alagyan.
Suno kay Balaan nga nagasakay sa motor ang mga biktima samtang sakay naman sa mazda nga pick-up ang suspek kag nagasundanay ang mga ini sang magluntad ang pagbaisay.
Pag-abot sa ila lugar, nagderetso sa ila balay ang suspek kag nagkuha sang armas luthang kag ginbalikan ang mga biktima kag ginpangtiro.
Gilayon naman nga gindala sa ospital sa Roxas City sanday Medalla kag Olarte, samtang nagpalagyo ang susp[ek kag at large tubtub subong.
