Davao City – Gikulata sa 30 ka tawo ang duha ka ulitawo tungod lamang kay ngil-ad ang ilang tingog sa pagkanta.
Napuno sa bun-og ang nawong ug ulo sa mga biktima nga mao sila si alyas Ian, 20 anyos, ug alyas Nathan, pulos taga-Cotabato ug nagtrabaho sa Toril ning siyudad.
Matud ni Ian, naglingaw-lingaw sila og kanta sa videoke sa Lizada, Toril alas-9:00 kagabii apan ang mga tawo sa ilang palibot wala ma-uyoni sa ilang mga tingog gumikan sa kayabag niini.
Unang natripan sa mga suspek mao si Nathan ug naapil si Ian dihang misuway kini og uwang sa pagpangulata sa mga kalalakin-an sa iyang kauban.
Segun ni Nathan, wala na sila makahimo pa sa pagdepensa sa ilang mga kaugalingon kay kahoy ug botelya ang gilambos sa ilang lawas ug nawong.
Gilayon nagpatambal sa Southern Philippines Medical Center (SPMC) ang mga biktima.
RadyoMaN Joel Viray
