Davao Occidental – Dead on arrival ang duha ka pasahero human gipangdala sa Malita District Hospital ug laing 50/50 ang gidala sa Southern Philippines Medical Center (SPMC) gumikan nabanga ang motorsiklo nga ilang gisakyan sa laing single nga motorsiklo alas 5:55 sa hapon niadtong Sabado didto sa national highway sa Brgy. Lacaron Malita, Davao Occidental.
Sa blotter sa Malita PNP naila ang nakabsan sa kinabuhi nga mao sila si Rian Dominggo, 15 anyos, Ronel General, 12 anyos, pareho nagpuyo sa Brgy. Pangian sakop sa maong lungsod ug usa ang nadala sa SPMC nga naila sa pangalang Clark Saturnino Jr., residente sa Laak ComVal Province.
Sa inisyal nga imbestigasyon sa Malita PNP sa pagpanguna ni PO1 Nicolas, gimanihuan sa usa ka Jun Clark ang usa ka Euro 175 nga walay plate number diin pag-abot sa nasampit nga lugar nabangaan ang laing single motorsiklo nga Euro nga walay plate number nga gidrayban sa usa ka Jun Luganel.
Sa kakusog sa dagan, nangalagpot ang mga pasahero ug maayong pagkabunal sa ilang lawas sa semento nga bahin ug human sa hitabo, daling gidala ang mga pasahero sa Malita District Hospital ug duha ang gideklara sa attending physician nga dead on arrival.
Ang duha ka patayng lawas gikuha na sa tigtungod ug gihaya na sa ilang pinuy-anan.
Samtang ang duha ka motorsiklo under custody na sa Malita PNP.
RadyoMaN Don Pulayao
