Pagadian City – Himas na karon sa mabugnaw nga rehas ang duha ka mga lalaki human kining nadakpan sa managsunod nga buy bust operation sa kapulisan sa dakbayan sa Pagadian sa managlahi nga dapit ning syudad. Wala na makaa-ikyas sa kamot sa balaod ang top most wanted person sa provincial level sa drug buy bust opreation nga gikasa sa hiniusang pwersa sa Regional Drug Enforcement Unit nga gipangunahan ni Police Lieutenant Alexes Bahunsua kauban ang Philippine Drug Enforcement Agency, Regional Intelligence Unit, 902nd Provincial Mobile Force Company ug tropa Pagadian City Police Station dihang dapita sa may Purok Capitol Clerk, Santo Niño Pagadian City.
Naila ang dinakpan nga si Abdula Benolirao Gaosil, usa ka steel man sa usa ka construction company nga nakabase sa Payao, Zamboanga Sibugay. Nakuha gikan sa posisyon sa dinakpan ang upat ka pakite sa gitoohang shabu ug usa ka libo nga buy bust money. Samtang laing suspetsado usab sa pagpayuhot og illegal nga druga ang nadakpan sa gikasa nga Drug Buy Bust Operation sa Station Drugs Enforcement Team kon SDET sa Pagadian City Police Station dihang dapita sa Purok Campo Islam, Barangay San Pedro, Pagadian City, alas 2 kapin kon kulang kagahapon sa hapon.
Naila ang dinakpan nga si Ismael Dacula Isah aka Mael, 29 anyos, minyo ug residente sa nahisgutan nga lugar. Nakumpiska sa iyang posesyon ang upat ka pakete sa gituohang shabu, usa ka libo ka pesos isip buy bust money. Gipaslak na karon prisohan ang mga dinkapan samtang nagtubang sa kasong paglapas sa Akta Republika 9165 kun Comprehesive Dangerous Drugs Act of 2002.
