Davao City – Patay ang usa ka laborer human gidunggab sa sakop sa KNB Gang alas 8:20 sa kagabhion nahitabo sa may Pag – asa St. Brgy. 5-A Bankerohan siyudad sa Davao.
Base sa report gikan San Pedro Pnp, naila ang biktima nga usa ka Papas Estosos, 17 anyos, residente sa Purok 2 Barayco sakop sa nahisgutang barangay samtang ang suspect mao si alyas Int, membro sa KNB gang ug walay kumpletong address.
Matud pa samtang naglakaw ang biktima sa naasoyng lugar padulong sa ilang silingan aron mag-internet, kalit siya giduol sa suspect ug sa way daghang isturya gilayon gidunggab tumong sa wala’ng dughan nga bahin.
Gisuwayan og dala ang biktima ngadto sa Brokenshire Hospital apan gideklara sa mga attending physician nga dead on arrival kini.
Base sa imbestigasyon sa San Pedro PNP, posibleng personal grudge ang hinungdan sa pagdunggab-patay sa biktima.
Sa pikas bahin, dead on arrival usab sa Southern Philippines Medical Center (PSMC) human nakaangkon og samad-dinungaban sa dughan nga bahin ang usa ka lalaki human giluba sa wala mailhing suspect kaganihang ala 1:00 sa kaadlawon natigayon sa may Bucana, Boulevard siyudad Davao.
Subay sa report sa SPMC, ang Biktima naila sa pangalang Joel Manos, 33 anyos, residente sa nasampit nga lugar.
Matud pa sa igsuon sa biktima, samtang nakig-inum ang biktima kauban ang iyang mga higala sa haya kalit kining giduol sa wala mailhing suspect dayon dunggab tumong sa dughan.
Daling gidala sa SPMC ang biktima apan gideklara sa mga attending physician nga dead on arrival.
RadyoMaN Don Pulayao
