Davao City – Dili na maselbrar pa sa usa ka nuwebe anyos nga bata ang iyang birthday karong Hulyo 21 human kini nalumos-patay sa dagat sa Coronon, Sta. Cruz, Davao del Sur.
Naligo si Geo Palatio, taga-Sitio Padada, Brgy. Coronon, Sta. Cruz, Davao del Sur uban ang iyang upat ka mga ig-agaw sa may lalom nga bahin sa dagat ug sa kakusog sa bul-og sa tubig nadala ang biktima.
Human nga nakita sa tulo ka mga trabahante sa W.L. Factory ang mga bata nga nangayo’g tabang dali silang nisalom ug gisulayan pa’g luwas ang bata apan naapil usab og kaanod ang usa sa mga nitabang nga si Arjay Adrias, 21 anyos, taga-Imelda, Matalam, North Cotabato.
Bandang ala-1:30 sa hapon ni-abot ang mga rescue team sa Sta. Cruz ug gipangita ang mga biktima.
Mag duha ka oras nga search and rescue ang gipahigayon ug sa dihang unang narekober ang lawas ni Arjay alas 2:00 sa hapon samtang bandang alas 2:30 sa hapon nakita usab ang lawas sa bata’ng si Geo.
Gidala gilayon sa Medcore Clinic ang mga biktima apan gideklara ni Dr. Alvin Pasuquin nga dead on arrival na duha.
Saysay sa uyuan sa 9 anyos nga si Roland Escanio nga nangaligo sila’g dagat aron nga iselebrar usab ang iyang adlawng natawhan apan ang paglipay-lipay nisangpot hinuon sa maong trahedya.
Ang mga patay’ng lawas sa duha ka biktima gidala na sa Anghel Funeral Parlor sa may Sta. Cruz, Davao del Sur.
RadyoMaN Aimee Guinita
