TACLOBAN CITY – Nakit-an han mga residente ha bakante nga lote an duha nga tiil han tawo ha Peerless Subdivision Brgy. Bagacay, Tacloban City kakulop, September 23.
Ginsulod ini ha usa nga karton ngan igintimpo ha iba pa nga mga basura.
Subay han testimonya han mga nagpakakita, usa nga babayi tikang ha Eastern Regional Medical Center (EVRMC) ha Cabalawan, Tacloban City an dumaop kan Albert Raagas, usa nga tricycle driver, ginbaydan han babayi hi Raagas hin P1,000 para iglubong an box nga mayada sulod han wala ngan tuo nga mga tiil han tawo.
Pero hi Raagas nangaro hin bulig kan Nonoy Rosalios, gintagaan ni Raagas hi Rosalios hin P150 para iglubong an karton pero nahikit-an la ini nga box upod an mga basura.
Sumala kan P/Capt. Daniel Polo, Tacloban PNP station 2 commander, mayada baratunon an naglabog labi na an nagsugo paglabog hini nga duha nga tiil.
“Ngatanan ini hira mayada baratunon labi na an nagsugo kayano nga ginpalabog ini niya nga parte hin lawas which is diri ginsusugad hito pag dispose, ginlulubong gud talaga ito hiya.”
Ha pagka yana, ginbibiling na han mga otoridad an babayi nga nagsugo pagpalubong hini nga duha nga tiil han tawo. (With reports from Leo Lledo, RMN News)
