Tapaz, Capiz – Duha ang patay samtang duha ang pilason sa natabo nga kinagamo sa Bangkerohan KTV bar nga nahamtang sa Brgy Poblacion banwa sang Tapaz pasado alas 11 kagab-i.
Ginkilala ang mga ginbawian sang kabuhi kanday Ritche Barnizo y Gardose,34- anyos ang pang-edaron sang Brgy. Daan Sur, Tapaz kag temporaryo nga nagapuyo sa Brgy. Artuz Tapaz. Ini ang nag-angkon sang patal nga kapilasan sa lawas tuga sang buno kag luthang.
Wala man matabangan sang gindangat sa ospital ang upod sini nga nakilala kay Alejandro Labrador nga taga- Brgy Roxas, Tapaz, Capiz.
Samtang pilason kag padayon nga ginabulong sa isa ka ospital sa syudad sang Iloilo ang magpakaisa nga sanday Joven kag Elemar Parofil nga lunsay nabun-an sang suspetsado nga ginkilala kay Robert Gamalando y Gimeno, 60-anyos ang pang-edaron nga amu ang live-in partner sang tag-iya sang nasambitan nga KTV bar.
Suno sa inisyal nga imbestigasyon sang Tapaz PNP, ginsiling ni Police Captain Edwin Luces nga hubog na sang nag-abot ang nasambitan nga mga biktima sa balay-ilimnan.
Bangud nga magahod na, ginsablaw ang mga ini sang suspek nga live-in partner sang tag-iya sang KTV bar apang wala ang mga ini mag-intindihanay kabangdanan sang komosyon. Naggabot ini sang kutsilyo kag nabun-an ang pila sa mga biktima samtang si Ritche Barnizo ang naluthangan.
Matapos ang insidente, madasig nga nagpalagyo ang suspek. Nagpatigayon pa sang hot pursuit operation ang kapulisan kag mga katapo sang Tapaz Security Force(TSF) apang wala madakpan ang suspek.
Narekober sa lugar sang krimen ang tatlo ka empty shell sang ginapatihan iya sang pistolized nga armasluthang. Tubtob sa subong padayon ang imbestigasyon sang mga kapulisan sa insidente.
