Labason, ZDN- Kritikal pa karon sa balay tambalan ang usa ka biktima human kini nahulog sa pangpang uban sa iyang mga barkada sa miaging adlawng sabado setyembre 15, 2018 bandang alas 12:20 AM.
Ang mga biktima mao si John Lloyd Bacog, 24 anyos kinsa mao ang nagmaneho sa sa motorsiklo, uban sa iyang tulo ka angkas nga sila si Jasper Midwasa, 18;Joshua Languido, 17; ug Hans Jefferson Languido, 18 pulos kini mga studyante ug residente sa brgy. Ubay, lungsod sa Labason.
Sa pag imbistiga ni PO1 Reynaldo Caboverde sakop sa PNP Labason, nasayran nga ang upat ka mga biktima gikan kini sa diskuhan didto sa la-union covered court ug nag inom kini sila niadtong higayona.
Human sa ilang lingaw-lingaw, naka disisyon ang mga mag barkada nga mo pauli na sa ilang panimalay sakay sa single motor star 110.
Pag abot nila sa lugar nahitaboan aksidenteng nahulog ang ilang motor sa pangpang ug maayong pagkaparok nila sa kongretong irigasyon hinungdan nga nakaangkon gayud sila ug mga bali sa ilang kalawasan.
Gisulayan pa ug dala sa balay tambalan si Hans Jefferson Languido apan patay na kining nahidangat sa ospital samtang ang drayber nga si John Lloyd Bacog ug Joshua Languido gidala kini sa Zamboanga Del Norte Medical Center, dinhi sa dakbayan sa Dipolog pero wala sab kaabot sa ospital si Joshua, nakabsan sab kini ug kinabuhi.
Samtang laing angkas niini nga si Jasper Midwasa, ang kasamtangan kritikal sa balay tambalanan.
Hinuon wala gikabutyag sa PNP labason kung kusog ba ang padagan apan pulos kini sila hubog niadtong higayona.
