Patay ang duha ka empleyado sang shipping company samtang pilason ang lima pa nila ka upod sang nahulog ang ila ginasakyan nga truck sa pika-pika nga malapit sa baybay sa Purok Azucena, Brgy. Banquirohan, Cadiz City, pasado las 7:00 sang aga, Mayo 3.
Ginkilala ang mga napatay nga sanday; Eric Isacala kag Nicolas Pagunsan, lunsay legal ang edad.
Pilason naman ang ila mga upod nga sanday Edmar Dela Peña, 44 anyos; Rolly Sinugban, 39 anyos; Mark Albay, 59 anyos; Vicente Albos, 54 anyos; kag Vic Pasinan, 29 anyos.
Padulong sa Cadiz City proper ang mga biktima kag sakay ang mga ini sang truck nga ginamaneho ni Erlito Tributante.
Sa interview sang DYHB sa hepe sang Cadiz City Police Station nga si Lt. Col. Robert Mansueto, ginpahayag sini nga yara naman sa estable nga kondisyon ang mga pilason.
Sa imbestigasyon, una nga naglabog ang duha ka napatay kag napilpilan sang truck kag nalumos.
Gina-alegar naman sang drayber suno kay Mansueto, nga nadulaan siya sang preno rason sang aksidente.
Hulaton naman sang Cadiz CPS kun magapasaka sang kaso ang pamilya sang mga biktima batok sa drayber sang truck.
[image: image.png]
