DUHA PATAY SA MAGKATUHAY NGA KASO SANG PAGPANGLUTHANG SA JARO KAG LAPAZ SINI NGA ADLAW SANG DOMINGGO.

3151

Duha ang patay sa magkasunod nga insidente sang pagpangluthang sa Distrito sang Lapaz kag Jaro sini nga adlaw, Enero 19.
Una nga insidente nagluntad sa Cuartero , Jaro mga alas 12 sang udto kon sa diin ang biktima ginkilala nga si Allen Muller, 40 anyos , pumuluyo sang nasambit nga lugar.
Ginluthang ang nasambit nga biktima sang suspek nga nagpanaug gikan sa Mitsubishi SUV nga duag gray.
Nakaagum sang 28 ka igo sang bala ang biktima nga gintunaan sang iya kamatayon.
Nahibaluan nga si muller ang anay call center agent kag tokhang surrenderee kag ginapahayag nga natalana ini nga ipa-rehab sang iya pamilya buwas nga adlaw, Enero 20.
Samtang, masunod nga insidente natabu mga alas 12:30 kaina man sang udto kon sa diin ang biktima ginluthang sang riding in tandem sa Nabitasan bridge samtang sakay sa iya mtorsiklo.
Ginkilala naman ang biktima nga si Delfin Britanico, 36 anyos sang Mirasol Subdivision, Dicen St., Lapaz, Iloilo kag anak ni anay Assemblyman Buddy Britanico.
Gindala pa sa ospital ang biktima apang gindeklarar nga dead on arrival.
Narecover sang kapulisan sa giluntaran sang insidente angt 10 ka basiyo sang caliber 45 nga pistola.
Padayon pa karon nga gina-imbestigahan sang kapulisan ang nasambit nga mga kaso sang pagpangluthang.

Facebook Comments