Davao City – Duha ka mga tawo ang gideklarang patay human matigayon ang managlaing insidente sa bangga dinhi sa syudad sa Davao.
Wala na matabang pa sa doktor sa Southern Philippines Medical Center (SPMC) ug nakabsan gayod sa kinabuhi ang 77 anyos nga lolo gumikan sa mga bun-og nga nahiagoman sa kalawasan niini.
Nadasmagan sa nagbangga nga mga bihikulo ang biktima nga si Jose Celo Sr., nagpuyo sa old San Isidro Buhangin, samtang patabok agi sa pedestrian lane alas 4:30 sa hapon.
Dali gisapupo sa Central 911 Medic Team si Celo paingon sa SPMC apan gideklara kini nga patay na ni Dra. Angelica Mary Joan Labradores alas 6:40 sa kagabhion.
Sa imbestigasyon sa Buhangin PNP, nadumbolan ang lubot sa Suzuki Jitney nga gidrayban ni Arnold Quiapo sa Kia nga gimanehoan ni Dominic Maligad.
Sa kakusog sa pagkadumbol, naabante ang Suzuki Jitney nga mao sab pagtabok sa biktima mao nabanggaan kini ug nalagpot og pila ka metros resulta sa mga bun-og sa kalawasan.
Nadamay pa ang usa ka Yamaha Mio nga gipanag-iyahan ni Raymund Torres ug ang usa ka Honda Fit nga iya ni John Palloto kansang pareho nakaparada sa highway sa mao nga lugar.
Temporaryong gikustodiya sa Buhangin PNP sila si Quiapo ug Maligad samtang gitun-an pa karon sa kapulisan kung si kinsa sa duha ang pasakaan og kasong reckless imprudence resulting to homicide.
Samtang patay usab ang usa ka lalaki sa nahitabong disrasya sa motor kaniatong Sabado sa kagabhion sa Davao-Bukidnon Road partikular sa may Calinan ning siyudad.
Mga biktima naila nga si Leopoldo Siton Naypa, 30 anyos, usa ka fruit sprayer nga mao ang nagmaneho sa single motorcycle samtang ang duha ka angkas nga sila si Danny Balbacua, lumad nga taga-Manay Davao Oriental, ug si Tito Matimbol Salandron, 35 anyos, residente sa Prk. 1 Matina Biao ningsiydad.
Sa rekord sa Tugbok PNP, padulong unta ang motorsiklo sa Calinan gikan Matina Biao apan sa pag-abot nila sa kurbada nga bahin nasemplang ang motor tungod sa paspas nga pagpadagan rason sa pagkahulog sa motor sa usa ka dakung kanal uban ang mga sakay niini.
Gitabang pa sa mga rescuers ang tulo ka mga lalaki apan gideklarang patay si Danny Balbacua tungod sa pagkabunal sa ulo sa semento.
Daling gidala ang duha ka mga samaran sa SPMC samtang anaa na sa Angel Funeral parlor si Balbacua
RadyoMaN Joel Viray / RadyoMaN Paul Canono
