Davao del Norte – Patay diha-diha ang duha ka mga lalaki samtang usa ang naangol human gipamusil sa wala mailhing suspetsado alas 4:00 ang takna sa buntag sa Purok 2 Brgy. Casoon Monkayo, Compostela Valley Province.
Ang biktima nga namatay giila sa mga pangalang Arnel Lopez, Aljun Lopez, samtang samaran si Roland Indab ug nakalingkawas sa kamatayon si Ariel Lopez, pulos hamtong ang pangidaron ug residente sa nahisgutang lugar.
Sumala sa report sa Monkayo Police Station, nasayran nga nahinanok sa pagkatulog ang mga biktima sa dihang kalit miabot ang wala mailhing suspek ug pugsanong misulod sa lawak nga gipahulayan sa mga biktima dayon gipamusil gamit ang wala matino sa kalibre nga armas hinungdan sa kamatayon sa duha ka biktima ug pagkaangol sa usa.
Swerteng nakalingkawas si Ariel Lopez human nahutdan og bala ang wala mailhing suspek ug daling misibat ang wala mailhing suspek palayo sa lugar.
Kasamtangang gi-imbestigahan sa kapolisan ang panghitabo.
RadyoMaN Juls Catisay
