Duha patay, usa kritikal sa managlaing insidente nga nahitabo dinhi sa syudad

103

Davao City- Wala pa masuta sa kapulisan ang motibo sa gipusil-patay nga usa ka trisikad driver kagabii sa Buhangin, ning syudad.

Giila ang biktima nga si Ramil Vargas, 29 anyos, minyo ug nagpuyo sa Carnation St., Buhangin.

Sumala sa imbestigasyon sa kapulisan sa Buhangin, nahitabo ang pagpamusil alas 7:30 kagabii samtang ang biktima anaa sa Pag-asa st., sa dihang gipusil sa wala mailhing nakamotorsiklo nga suspetsado nga miresulta sa kamatayon ni Vargas.


Sa laing insidente kaniadtong Sabado sa gabii, July 8, 2017, patay usab ang usa ka ulitawo nga giilang si Renato Luperme Lapot, 36 anyos nga nakapuyo sa Camias St. Brgy. Ubalde, Agdao ning syudad human gidunggab sa nailhang suspetsado nga si John Walter Diaz, 22 anyos ug taga Purok 9, South Bay, Bgry. Lapu-Lapu, Agdao.

Nasayran sa kapulisan sa Sta. Ana nga igo lang nagtindog ang biktima sa usa ka poste kauban ang mga barkada sa dihang mibutho ang suspek nga si Diaz ug gidunggab sa makadaghang higayon nga miresulta sa kamatayon ni Lapot.

Daling miikyas ang biktima nga padayon pang ginapangita sa kapulisan.



Sa pikas bahin, gihatod gilayon sa balay tambalanan ang gipusil nga usa ka drayber nga giilang si Dennis Escaran, 29 anyos, samtang nagtorno sa usa ka terminal sa San Miguel Panacan, syudad sa Dabaw.

Base sa imbestigasyon sa kapulisan, nahitabo ang pagpamusil sa wala mailhing lalaki, alas 9:30 kagabii sa dihang giduol ang biktima ug gipusil diin naigo ang likod niini hinungdan nga kritikal karon ang kahimtang sa biktima.


Sa pagkakaron padayon pang ginasusi sa kapulisan ang motibo sa mga suspek sa tulo ka managlaing insidente.

Kasamang Renelyn Barbarona

Facebook Comments