Davao City- Mga bata nga nagdula og lighter ang gituohang maoy hinungdan sa kalayo nga misunog sa dul-an 20 ka mga balay sa Purok San Miguel Barangay Leon Garcia Gotamco Agdao syudad sa Davao, niadtong sabado sa udto.
Kini ang gikumpirma ni Bureau of Fire Protection Davao Senior Fire Officer 2 Ramil Gillado base sa imbestigasyon sa ilang buhatan.
Matod ni Gillado atol sa sunog, adunay 19 ka mga panimalay ang totally damaged, samtang 3 niini ang partially damaged.
Dugang pa niini nag sugod ang kalayo alas-11:30 ug gideklarang fire out bandang alas-2:30 sa kahaponon.
Sa pikas bahin nanawagan karon ang mga residente nga nabiktima sa sunog sa hinanaling tabang alang sa subling pagtukod og balay human naugdaw ang ilang pinuy-anan.
Sumala sa usa sa mga bikitima sa sunog nga si Shiela Mae Aparece, nakadawat na sila ug inisyal nga hinabang sama sa mga pagkaon, kagamitan ingon man mga sanina apan bugtong gikinahanglan nila mao ang mga materyales aron subling itukod ug balay.
