Davao City – Miabot sa 19,283 ka mga pasahero ang natala ug natabangan sa Coast Guard District Southeastern Mindanao (CGDSEM) samtang nagpadayon ang pagbiyahe sa katawhan atol sa ulahing adlaw sa Semana Santa 2026, base sa datos hangtod alas-6:00 sa gabii sa Abril 5, 2026, gikan sa nagkalain-laing pantalan sa rehiyon.

Sumala sa CGDSEM, gipakusgan pa ang ilang maritime safety operations ubos sa Oplan “Byaheng Ayos: Semana Santa 2026” aron masiguro ang kaluwasan ug kahapsay sa biyahe sa publiko.

Apil sa ilang mga lakang ang regular nga inspeksyon sa mga sakayan ug pantalan, diin 46 ka vessel ug 55 ka motorized banca (MOCA) ang ilang nasusi, samtang 2,290 ka rolling cargoes usab ang natala.

Gibutyag usab sa Coast Guard nga 870 ka personahe ang ilang gipakatag aron motabang sa crowd control, safety monitoring, ug emergency response. Samtang, giawhag sab ang publiko nga magpabiling alerto ug mosunod sa mga safety protocols.

RadyoMaN Kareen Beltran