Davao City – Nasunog ang dul-an 50 ka mga panimalay diin naapektuhan ang kapin 70 ka mga pamilya apil na ang owner, sharer ug renters diha sa may Purok San Jose Waling-waling St., Daliao Toril, Davao City nga nagsugod bandang alas dose y media sa udto kaganina.
Subay sa report sa BFP 11 Toril District nga gipanubayan ni Fo Erwin Alcosaba, nagsumikad ang sunog ngadto kang Dante Tubig ug napasagdan nga niluto ang hinungdan sa maong sunog.
Tungod sa kakusog sa huyop sa hangin dali kining mikanit sa mga kasikbit nga mga balay ug nasunog ang daghang mga balay ug gamit.
Dunay tulo k mga na injured nga sila si Dante Tubig, Melanie Ihos ug Jesie Garcia nga dali gitabang sa medic team sa 911 ug luwas na sa makuyaw nga kahimtang.
Hinoon nagpasalig si Brgy. Kapitan Rodofo Te nga dunay gi andam nga lugar diin pwede silang temporaryong makapyo ug anaa usab ang taga CSSDO aron muhatag og pasiunang tabang sa mga nabiktima sa sunog.
RadyoMaN Paul Canono
