Dul-an 600 Davao delegates ipadala sa Palarong Pambansa 2023

Gilangkoban sa mga atleta, coaches, ug chaperons ang dul-an 600 delegates gikan sa Davao Region nga musalmot sa subling pagbalik sa Palarong Pambansa 2023 sa Marikina City karong July 29-August 5, 2023, diin kini ang unang Palaro gikan niadtong 2020 nga nakasansela ang mga aktibidad tungod sa COVID-19 pandemic.

Sumala ni Department of Education (DepEd) XI Regional Director Allan Farnazo atol sa send-off ceremony sa mga delegado nga gilusad sa Tagum City niadtong Sabado, July 22, 2023, dul-an 200 delegates ang naggikan sa Elementary, kapin 300 sa Secondary, samtang kapin 56 sa Paragames diin sa maong mga ihap, 60% niini naggikan sa Davao City.

Dugang ni Farnazo, tinguha karon sa Davao Eagles nga makasakmit og kapin 40 ka gold medals ug musaka ang ranking gikan sa Rank 11 niadtong Palarong Pambansa 2019 nga gilusad dinhi sa Davao City.

Matud sa opisyal nga isip kabahin sa motivation sa mga atleta, kini ang pinakaunang higayon nga muhatag sila sa kantidad nga P25-K cash incentives sa matag atleta nga makasakmit og gold medal diin kini ihatag dayon sa DepEd XI sa panahon nga ianunsyo dayon ang gold medalists. Sumala pa nga anaa sa P3 million ang giandam gi-cash advance sa DepEd XI alang sa incentives.

Nakatakda nga mularga ang mga delegado karong adlawa aron usab makahunat sa maong paugnat nga kusog.

RadyoMaN Renz Barbarona