Davao City – Mobalor sa P960K nga shabu ang nasakmit atol sa buy-bust operation sa mga personahe sa Philippine Drug Enforcement Agency (PDEA-XI) uban ang Davao del Sur Police Provincial Office, Provincial Drug Enforcement Unit sa Purok 2, Barangay New Opon, Magsaysay, Davao del Sur.
Sa maong operasyon, arestado ang mga manag-uyab nga sila si Bangilista Naga Eson alyas Vhangs, 31, taga-Labungan, Datu odin Sinsuat, Maguindanao ug Clarrish Flores Orevillo alyas Kakay, 19 anyos, residente sa Barangay Sinawilan, Digos City, Davao del Sur.
Ang duruha daling giposasan sa mga awtoridad human positibong napalitan og shabu sa kantidad P1,000.
Na-rekober diha sa mga dinakpan ang usa ka jumbo size kun 60 gramos nga shabu nga adunay street value nga P960,000 ug mga drug paraphernalia.
Matud ni PDEA-XI Assistant Regional Director Atty. Behn Tesiorna, ang duha ka mga dinakpan giingong supplier og droga sa Davao del Sur nga ginakuha pa nila gikan sa Cotabato City.
Kasong kalapasan sa RA 9165 kun Dangerous Drugs Act atubangon sa mga dinakpan.
RadyoMaN Aimee Guinita
