Nakasakmit ang kapulisan sa rehiyon siete ug mga sakop sa Philippine Drug Enforcement Agency kun PDEA-7 og dul-an sa usa ka bilyon ka pesos nga balor sa ilegal nga drugas sukad milingkod sa katungdanan si Presidente Rodrigo Duterte usa ka tuig na ang nakalabay .
Mokabat sa 72 kilos ang nakuha nga shabu nga mobalor sa kapin 800 milyones pesos sa duha ka mga ahensya sa gobiyerno subay sa gipahugtan niining kampanya batok sa ilegal nga drugas nga alang kanila nipakunhod sab sa krimen .
Matod ni Police Regional Office kun PRO-7 Director Noli Taliño nga tungod sa ‘intensified campaign’ nila ug subay sa pagkonsidera sab nga usa kini sa mga priority programs ni Duterte, gitutokan sa kapulisan ang pagpuhag sa ilegal nga drugas hinungdan nga nakuha nila ang maong kalamboan .
Basi sa datos sa PRO-7, nakasakmit sila og gibana-bana 34.7 ka kilo sa ilegal nga drugas nga mokantidad og kapin sa 409 milyones pesos sud sa gilusad nilang sobra sa lima ka libo nga anti-drug operation sukad niadtong Hulyo uno sa miaging tuig hangtod Hunyo 30 karong tuiga .
Nitala sab ang kapulisan sa rehiyon siete og sobra sa siyam ka libo ka tawo nga nangadakpan, sobra sa 108 mil ang nitahan sa Oplan Tokhang, ug 183 na ang nakalas atol sa gihimo nilang mga operasyon .
