Davao City – Bisan pa man sa kalit nga pagbusdak sa ulan, wala kini makapugong aron mahinayon ang aktibidad sa atong kaigsoonang lumad ug moro nga mao ang Dula Kadayawan o ang Tribal Games sa People’s Park ning syudad sa Davao diin subay kini sa pagsaulog sa Indigenous People’s Day karong adlawa, Agosto 17.
Sumala ni 2018 Kadayawan Festival Director Gatchi Gatchalian, ang Dula sa Kadayawan usa ka pamaagi aron masabtan sa Dabawenyo ingon man sa mga bisita ang kultura sa mga lumad pinaagi sa mga dula niini.
Opisyal kining gi-ablihan alas 8:00 sa kabuntagon dayon gisugdan ang mga dula sa lumad sama sa Siklot, Solopot, Pana, Bubuntug, Kakasing, Usuroy (Tug of War), Sosakoro, Totaringki ug Karang.
Samtang sa kahaponon ang mga dula sa Moro sama sa Sipa sa Lama, Sipa sa Manggis ug Kanggaratoya (Tug of War) diretso sa awarding ceremony.
Segun ni Gatchalian nga gawas sa medalya mas dako karon ang madawat sa over-all champion nga nagkantidad sa P80,000, samtang P70,000 sa second prize ug P50,000 alang sa third prize.
Onse ka mga tribu sa syudad sa Davao ang nagtigiay sa maong ‘Dula Kadayawan’ nga mao ang Ata, Bagobo Klata, Bagobo Tagabawa, Matigsalog, Iranun, Kagan, Maguindanaon, Maranao, Sama, Tausug ug Obu-Manuvu.
RadyoMaN Jason Amisola
