Davao City – Ang road crash sa may Binugao, Toril tali sa usaka bus ug Wing Van nga gikamatay sa upat ka pasahero ug ang latest nga pagkadisgrasya sa truck sa Matina Pangi diin upat usab ang on-the-spot patay kagahapong adlawa pahinumdom lamang sa importansya sa pagkamabinantayon gayud sa manibela ug pagbyahe sa kadalanan.
Subay sa eksperyensya ni Southeastern Mindanao Diversified Drivers & Operators Cooperative (SEMDOCC) President Maning Duran, sagad sa hinungdan sa disgrasya mao gayud ang human ug mechanical error.
Kasagaran sa abusadong mga drivers kun makapadagan sa ilang mga behikulo daw nangandoy sa ilang sayo nga kamatayon ug ang kapait kay madamay pa sa ilang pagka-iresponsable ang inosenteng mga pasahero or mga pedestrians.
Sumala ni Duran, kinaiya pa gayud sa mga iresponsabling driver mao nga basta na lamang silang mugunit ug magpadagan sa ilang mga behikulo bisan og wala masusi ang kondisyon sa drayban resulta nga madisgrasya na hinoon.
Kini nagpasabot lang nga daghan gihapon sa mga driver wala makakat-on sa mga dugoong disgrasya nga nagapanghitabo diha sa mga kadalanan nga mikalas na og daghang kinabuhi.
Gisugyot ni Duran nga aduna na gayo’y hinanali nga pagpatuman sa driving training ug seminars nga ilusad ang Land Transportation Office (LTO) alang sa mga maggunit og manibela.
Gawas niini, gikinahanglan usab nga butangan na og klaro ug maha-it nga ngipon ang mga balaud-trapiko nga ma-oy kulang sa implementasyon sa mga regulasyon alang sa luwas nga pagbiyahe diha sa mga kadalanan.
Aminado si Duran nga walay makasulti kung kanus-a muduaw ang disgrasya ug kinsa usab ang mabiktima apan kun responsible lamang gayud ang muhawid sa manibela, hayan malikayan gayud ang peligro sa pagbiyahe.
RadyoMaN Joel Viray
