Davao City – Gibati karon ug kabalaka si Presidential Adviser on the Peace Process Jesus Dureza sa nahitabong pagpang-atake sa New People’s Army nagdto sa mga personahe sa Presidential Security Group (PSG) sa tri-boundary sa Davao, Bukidnon ug Arakan North Cotabato.
Sa usa ka media interview, gipaambit ni Dureza ang lig-ong baruganan sa gobyerno ug sa klarong marching order ni Pres. Rodrigo Duterte nga ipadayon lamang ang peacetalks kun ma-establisar ang usa ka ‘conducive or enabling environment’ diin makita ang sinseridad sa hut-ong sa mga rebelde pagkab-ot sa maluntarong kalinaw sa nasud pinaagi sa pagtapos sa armadong panaggubat nga nilanat na sa lima ka dekada.
Matud ni Dureza, nakita kini niya sa dihang adunay usa ka higayun niana diin hugot silang gimanduan ni Duterte nga mamutos ug mopauli kun ‘pack up tents’ taliwala sa gipahigayong peacetalks niadtong tungora nga nadiskaril sa dihang laing pagpang-atake gihimo sa NPA sa pipila ka mga personahe sa gobyerno.
Bag-ohay pa lamang, subling nagmando ang pamuno-nasud ngadto sa mga negosyador sa gobyerno nga undangon usa ang pakig-istorya ngadto sa rebeldeng pundok hangtud nga sila makapakita ug sinseridad pinaagi sa pag-undang sa opensiba nagdto sa mga awtoridad ingon man ang pagpadaplin sa ilang revolutionary tax collection.
Nasayran nga aduna untay gikatakdang informal back channel talks una pa matapos ning bulana ug una pa ipursigi ang gikatakdang 5th round sa peaectalks abroad apan bisan kini daw anaa na karon sa mangitngit nga posibilidad gumikan sa PSG convoy attack.
Kasamang June Duterte
