Davao City – Gibatikos sa Global Alliance Progressive Labor (GAPL) si Pres. Rodrigo Duterte sa sige og panulisok kang kanhing Pangulo Benigno Aquino Jr. labot sa isyu sa West Philippine Sea nga gitukuran na karon og missile system sa China.
Gipuna ni GAPL Convenor Joshua Mata si Pangulong Duterte kay wala kini nahimo aron panalipdan ang mga isla gikan sa China diin imbis kaukuhon ang responsibilidad gimahay naman hinoon si PNOY.
Suma ni Mata, aduna namay legal basis ang gobyerno aron ipamugos ang pag-angkon sa mga isla nga giilog sa China kay midaog naman ang Pilipinas sa arbitral case dihang si PNOY ang Pangulo.
Busa kug duna ma’y angay mahayon ngano nakalusot ang China sa pagmontar og missile system sa West Philippine Sea kana walay lain kundi ang gobyerno karon ug dili si PNOY.
Gisukmatan pa ni Mata ang pamuno nasud sa wala matuman nga saad niadtong panahon sa piniliay nga musakay kini og jetski aron tukuran og bandila ang mga isla nga giilog sa China.
Gawas nga walay nahimo ang gobyerno karon sa pagdepensa sa West Philippine Sea daw gipasagdan sab sa kagamhanan nga mahimong kolonya ang nasud sa China.
Gani ang pakighigala ni Duterte sa China walay kalainan sa pagyukbo samtang ang ubang nasud sama sa Estados Unidos gisalikway ang pakigsuod tungod sa independent foreign policy.
Apan walay kapuslanan ang tanan kay gipasagdan ra man ang China nga himoon nilang kolonya ang Pilipinas sa ilang nasud.
DakU ang mawala sa ekonomiya sa Pilipinas karon nga nakontrolar na sa China ang West Philippine Sea diin ang tanang barko nga walay permiso aron muagi puwede na nila tirohon sa ilang missile.
Nabalaka ang maong convenor nga basin dili lang hulga sa seguridad ang ihatud apan lakip na ang panarbaho sa mga mamumuo ugaling maapektohan ang ekonomiya sa nasud tungod sa blocking sa kadagatan nga agian sa international vessel.
Busa hinanali nga aksyon angay himoon sa mga nasud nalambigit sa isyu sa West Philippine Sea aron masulbad ang bangi sa teritoryo sa malinawon nga pamaagi ug dapat kini pangunayan sa gobyernong Duterte.
RadyoMaN Joel Viray
