Davao City – Dayag kang AKBAYAN Partylist representative Tom Villarin nga binuhatan sa CPP-NPA-NDF sa pagsunog sa propiedad sa mga kompanya nga wala muhatag sa extortion ug pagpatay sa mga inosente.
Mao nga wala na matingala si Villarin nga gikunsidara na ni Presidente Rodrigo Duterte ang CPP-NPA-NDF nga terorista ug kriminal ug dili na rebelde.
Apan daw migula nga mas gimahay pa sa kongresista si PRRD sa pagkahugno sa hinabing pangkalinaw ug hagbay ra unta natuldukan ang atrocities sa CPP-NPA-NDF sa ato nga dapit.
Gibarugan ni Villarin nga bisan og walay puas ang atake sa mga NPA sa mga sundalo, mga pulis, mga sibil-yan ug mga kumpanya gikinahanglan mubalik sa peace talks ang gobyerno ug CPP-NPA-NDF.
Wala nay nakita nga laing pamaagi ang magbabalaod aron mahunong na ang pagpinatyanay gawas sa pagbalik sa gobyerno ug mga komunista sa peace talk.
Matud sa representante sa AKBAYAN Partylist nga ilegal kun wala masunod sa balaod ang laraw ni PRRD nga magdeklara kini og revolutionary government.
Dako ang pagtoo ni Villarin nga dili makadawdaw og suporta sa katawhan,sa militar ug bisan sa mga kongresista ang revolution government nga hayan ipatuman ni PRRD kun mas mugrabe ang kasamok sa nasud.
Andam supakon ni Villarin ang laing hugna sa paglugway sa martial law sa Mindanao kay dili kuno kini tukma nga tubag sa paglutos sa mga teroristang npa human sa Disyembre.
Dugang pa niini nga dili magsilbi ang martial law sa giyera kontra droga inay ang puwersa sa kapulisan angay gamiton sa pagpaspas sa salot sa kaugmaon sa mga kabataan karon nga mao ang droga.
Ang hini-usa nga puwersa sa katawhan mas labaw nga epektibo sa pakiggiyera sa droga nga mikuyanap dili lang sa Pilipinas apan bisan sa tibook kalibutan.
RadyoMaN Joel Viray
